Bichar ke Mujh Se Kabhi Tu Ne Ye Bhi Socha Hai
Bichar ke Mujh Se Kabhi Tu Ne Ye Bhi Socha Hai
Adhura Chand Bhi Kitna Udaas Lagta Hai
Ye Khatme-Wasal Ka Lamha Hai Raigaan Na Samajh
Ke Is ke Baad Wohi Dooryon Ka Sehra Hai
Kuch Aur Der Na Jharna Udassiyon Ke Shajar
Kise Khabar Tere Saye Main Kaun Baitha Hai?
Ye Rakh-Rakhao Muhabat Sikha Gaye Us Ko
Wo Rooth Ker Bhi Mujhe Muskura Ker Milta Hai
Main Kis Tareh Tujhe Daikhon Nazar Jhijhakti Hai
Tera Badan Hai Ke Ye Ainoon Ka Darya Hai?
Kuch Is Kadar Bhi To Aasan Nahi Hai Ishq Tera
Ye Zeher Dil Main Utar Kar Hi Raas Aata Hai
Mai Tujh Ko Pa Ke Bhi Khoya Hua Sa Rehta Hoon
Kabhi Kabhi To Mujhe Tu Ne Theek Samjha Hai
Mujhe Khabar Hai Ke Kya Hai Judaiyon Ka Aazaab
Ke Main Ne Shaakh Se Gul Ko Bicharte Dekha Hai
Mai Muskura Bhi Para Hun To Kyon Khafa Hain Ye Log
Ke Phool Tooti Hui Qabar Par Bhi Khilta Hai
Isay Ganwaa Ke Main Zinda Hoon Is Tarah
Ke Jaise Taiz Hawa Main Chiraagh Jalta Hai…
Tu mera naam na poocha ker
Tu mera naam na poocha ker
Mein teri zaat ka hisa hoon
Mein teri soch me shamil hoon
Mein teri neend ka qisa hoon
Mein tere khawab ka hasil hoon
Mein teri yaad ka mehwer hoon
Tu manzer, mein ps-e-manzer hoon
Mein lamha hoon mein jazba hoon
Jazbe ka koi naam nhi
Tu mera naam na poocha ker
Ankhon main koi khawab utarnay nahi deta
Ankhon main koi khawab utarnay nahi deta
Yeh dil ke mujhe chain se marnay nahi deta
Bichre tu ajab pyar jatata hai khaton main
Mil jaye tu phir hud se guzarnay nahi deta
Wo shakhs khizaan rut main bhi muhtat hai kitna
Sookhay hue phoolon ko bikharnay nahi deta
Ik rooz teri pyas khareeday ga wo shaks
Pani tujhe panghat se jo bharnay nahi deta
Main us ko manaoon, ke gham-e-dahar se uljhoon
“MOHSIN” wo koi kaam bhi kernay nahi deta
Ab meray ehsas-e-janoon kia mujhe dena
Ab meray ehsas-e-janoon kia mujhe dena
Darya usay bakhsha hai to sehra mujhe dena
Tum apne dil ka makaan jab karo taqseem
Girti hoi dewaar ka saya mujhe dena
Jab waqt ki murjhaati hoi shaakh sambhalo
Us shaakh se toota hoa lamhaa mujhe dena
Choo jaye hawa jis se to khushbu teri aye
Jatay hoye ik zakhm to aisa mujhe dena
Ik dard ka mailaa laga hai dil-o-jaan main
Ik rooh ki awaaz ka rasta mujhe dena
Ik taaza ghazal azn-e-sukhan mang rahi hai
Tum apna mehakta howa lehja mujhe dena
Woh mujh se kahin badh ke museebat main tha “MOHSIN”
Reh reh k magar us ka dilasa mujhe dena
Kahan yeh bas main ke khud ko honsla detey
Kahan yeh bas main ke khud ko honsla detey
Yehi bohat tha ke har gham pe muskra detey
Hamare aaks main hoti jo zakhm-e-dil ki jhalak
Hum ainey ko bhi apni tarah rula detey
Humain bhi jo roshniyon pe dastaras hoti
Kabhi charagh jalatay, kabhi bujha detey
Hamarey paoon hawaon ki zad main they warna
Guzrati umar ko ruk ruk k sada detey
Ab us ki yaad se us ka badan trashatey hain “MOHSIN”
Woh khawab bhi to nahin tha ke hum bhula detey
Badan main utrain thakan ke saaye to neend aye
Badan main utrain thakan ke saaye to neend aye
Yeh dil kahani koi sunaye to neend ayay
Bhujhi bhujhi raat ki hatheli per mukra ker!
Charagh-e-wada koi jalaye to neend ayay
Hawa ki khawahish pe kon aankhain ujaarta hai
Diye ki loo khud se thar-tha-raye to neend ayay
Bas ik aansoo bohat hai”MOHSIN” ke jaagnay ko
Yeh ik sitara koi bhujaye to neend ayay
Jab aankh main kuch khaak si urti nazar ayi
Jab aankh main kuch khaak si urti nazar ayi
Samjhe sabhi khush-fahem haad-e-safar ayi
Ik umer to jagay thay ke chhat jaye andhera
Pal-bhar ko lagi ankh to milne seher ayi
Dil main hai ajab saat-e-no roz ka aalam
Bhooli hui ik yaad sar-e-shaam gher ayi
Us ne bhi kia raah badalne ka irada
Ik tuhmat-e-paiham thi ke “MOHSIN” ke ser ayi
Zindagi kya hai kabhi dil mujhe samjhaye to!
Zindagi kya hai kabhi dil mujhe samjhaye to!
Maut achi hai ager waqt pe aa jaye to!
Mujh ko zid hai ke jo milna hai falak se utre!
Us ki khawahish hai daaman koi phailaye to!
Kitni sadiyon ki rafaqat, main usay pehna dun!
Shart yeh hai woh musafir kabhi laut aaye to!
Dhoop “MOHSIN” hai ghanimat mujhe ab bhi laikin!
Meri tanhai ko saya mera behlaye to _____ !
Mar-ke ab ke howa to phir yun ho ga
Mar-ke ab ke howa to phir yun ho ga
Tere darya pe meri pyas ka pehra ho ga
Kitnay jugno isi khawahish main mere saath chalay
Koi raasta tere ghar ko bhi to jata ho ga
Main bhi apne aap ko bhulaye phirta hun bohat
Aaina us ne bhi kuch roz se na dekha ho ga
Raat jal-thal thi meri aankhon main utar aya
Suurat-e-abar koi toot ke barsa ho ga
Yeh masehai usay bhool gayi hai “MOHSIN”
Ya phir aisa hai mera zakhm ke gehra ho ga
No comments:
Post a Comment