Friday, 2 May 2014

Is Qadar Musalsal Thi Shiddatein Judaai Ki

Is Qadar Musalsal Thi Shiddatein Judaai Ki
Aaj Pehli Baar Main Ne Us Se Bewafaai Ki

Warna Ab Talak To Yun Tha Khawihshon Ki Baarish Main
Ya To Toot Kar Roya Ya Ghazal Saraai Ki

Tanz, Tana, Tohmat Sab Teer Hain Waiz Kay
Aap Say Koi Poochay Hum Nay Kya Buraai Ki

Hum Ne Teri Chahat Main Taj Diya Tha Jin Jin Ko
Aaj Phir Main Ne Un Se Taaza Aashnai Ki

Dukh Hua Jab Us Dar Per Kal Faraz Ko Daikha
Laakh Aib The Us Main , Khu Na Thi Gadaai Ki


Hum Bhi Sha'air The Kabhi Jaan-E-Shukhan Yaad Naheen

 Hum Bhi Sha'air The Kabhi Jaan-E-Shukhan Yaad Naheen
Tujh Ko Bhulein Hain To Dildaari-E-Fan Yaad Naheen

Aqal Ke Shehar Main Aaya Hai To Yun Gum Hai Junoon
Lab-E-Goya Ko Bhi Besaakhta-Pan Yaad Naheen

Waqt Kiss Dasht-Faramoshi Main Le Aaya Hai
Ab Tera Naam Bhi Khakum-B-Dahan Yaad Naheen

Har Koi Navak, Tarkash Ki Dukaan Poochta Hai

Kissi Gahak Ko Magar Apna Badan Yaad Naheen

Baat Kar Tujh Pe Gumaan Hone Lagaa Tasveer Kaa

 Baat Kar Tujh Pe Gumaan Hone Lagaa Tasveer Kaa
Muntazir Kab Se Hai Zamaana Teri Taqreer Kaa

Raat Kyaa Soye Ki Baaqi Um'r Ki Neend Urh Gai
Khwaab Kya Dekha Ki Dharhka Lag Gaya T'abeer Kaa

Kaise Paayaa Tha Tujhe Kis Tarah Khoya Tujhe
Mujh Saa Munkir Bhi To Qaayal Ho Gaya Taqdeer Kaa

Jaane Kis Aalam Men Tun Bichhraa Hai Ki Tere Bagair
Aaj Tak Har Naqsh Fariyaadi Hai Meri Tehrir Kaa

Jis Ko Bhi Chaahaa Barhi Shiddat Se Chaahaa Hai Faraz

Silsilaa Tuutaa Naheen Hai Dard Ki Zanjir Kaa

Sannate Ki Jheel

 Tujh Se Bichad Kar Bhi Zinda Tha
Mar Mar Ke Zehar Piya Hai

Chup Rehna Aasaan Nahi Tha
Barson Dil Ka Khun Kiya Hai

Apne Haal Pe Khud Roya Hun
Khud Hi Dil Ka Chaak Siya Hai

Jo Kuch Guzri, Jaisi Guzri
Tujh Ko Kab Ilzaam Diya Hai

Kitni Jaankahi Se Main Ne
Tujh Ko Is Dil Se Mehav Kiya Hai

Sannaate Ki Jheel Mein Tu Ne

Phir Kyun Paththar Phenk Diya Hai

Ranjish Hi Sahi

 Ranjish Hi Sahi, Dil Hi Dukhaane Ke Liye Aa
Aa Phir Se Mujhe Chod Ke Jaane Ke Liye Aa

Phele Se Maraasim Na Sahi, Phir Bhi Kabhi To
Rasm-O-Rahe Duniya Hi Ninbhaane Ke Liye Aa

Kis Kis Ko Bataayenge Judaai Ka Sabab Hum
Tu Mujh Se Khafa Hai To Zamaane Ke Liye Aa

Ab Tak Dil-E-Khush Faham Ko Hai Tujh Se Umeedein
Yeh Aakhri Shame Bhi Bhujaane Ke Liye Aa

Kuch To Mere Pindar-E Mohabbat Ka Bharm Rakh
Tu Bhi To Kabhi Mujh Ko Manaane Ke Liye Aa

Ek Umar Se Hun Lazzat-E-Girya Se Bhi Mehroom

Aie Raahat-E-Jaan, Mujh Ko Rulaane Ke Liye Aa