Friday, 2 May 2014

Jis Simt Bhi Dekhoon, Nazar Aata Hai Keh Tum Ho

 Jis Simt Bhi Dekhoon, Nazar Aata Hai Keh Tum Ho
Aie Jaan-E-Jahaan Yeh Koi Saaya Hai Keh Tum Ho

Yeh Khuwaab Hai, Khushboo Hai, Ke Jhonka Hai, Ke Pal Hai
Yeh Dhund Hai, Baadal Hai, Ke Saaya Hai, Keh Tum Ho

Is Deed Ki Saa'at Main Kayee Rung Hain Larzaan
Main Hoon Ke Koi Aur Hai, Duniya Hai, Keh Tum Ho

Dekho Yeh Kisi Aur Ki Aankhen Hain Ke Meri
Dekhoon Yeh Kisi Aur Ka Chehra Hai Keh Tum Ho

Yeh Umr Garezaan Kahin Theray To Yeh Jaanoon
Her Saans Mein Mujh Ko Yehi Lagtaa Hai Keh Tum Ho

Her Bazm Mein Mozoo-E-Sukhan Dil-E-Zadgaan Ka
Ab Kaun Hai Sheereen Keh Laila Hai Keh Tum Ho

Ek Dard Ka Phaila Hua Sehra Hai Ke Main Hoon
Ek Mauj Mein Aaya Hua Darya Hai Keh Tum Ho

Woh Waqt Na Aaye Ke Dil-E-Zaar Bhi Sochay
Is Shehr Mein Tanha Koi Tum Sa Hai Keh Tum Ho

Aabaad Hum Aashufta Saron Se Nahin Maqtal
Yeh Rasm Abhi Shehr Mein Zinda Hai Keh Tum Ho

Aie Jaan-E-Faraaz Itni Bhi Taufeeq Kise Thee
Hum Ko Ghame Hasti Bhi Gawaraah Hai Keh Tum Ho


Yeh Tabi'aat Hai To Khud Aazaar Ban Jaayen Ge Ham

Yeh Tabi'aat Hai To  Khud Aazaar Ban Jaayen Ge Ham
Chaaragar Royein Ge Aur Gham Khwaar Ban Jaayen Ge Ham

Ham Sar-E-Chaak-E-Wafaa Hain Aur Tira Dast-E-Hunar
Jo Bana De Ga Hamein Aie Yaar, Ban Jaayen Ge Ham

Kya Khabar Thi Aie Nigaar-E-She'r, Tere Ishq Mein
Dilbaraan-E-Sheh'r Ke Dildaar Ban Jaayen Ge Ham

Sakht Jaan Hain Par Hamaari Ust'vaari Par Na Ja
Aise Tootenge, Tira Iqraar Ban Jaayen Ge Ham

Aur Kuchh Din Baithne Do Ku-E-Jaanaan Mein Hamein
Raftaa Raftaa Saaya-E-Deewar Ban Jaayen Ge Ham

Is Qad'r Aasaan Na Hogi Har Kisi Se Dosti
Aashnaa'i Mein Tira May'aar Ban Jaayein Ge Ham

Meer-O-Ghalib Kya Keh Ban Paaye Naheen Faiz-O-Firaaq
Za'm Ye Tha Roomi-O-Ataar Ban Jaayein Ge Ham

Dekhne Mein Shaakh-E-Gul Lagte Hain Lekin Dekhnaa
Dast-E-Gulcheen Ke Liye Talwaar Ban Jaayein Ge Ham

Ham Chiraagon Ko To Taa'reeki Se Larhnaa Hai Faraaz
Gul Huay Par Subah Ke Aasaar Ban Jaayein Ge Ham


Mustaqil Mehroomiyon Par Bhi To Dil Maana Naheen

Mustaqil Mehroomiyon Par Bhi To Dil Maana Naheen
Laakh Samjhaaya Ke ,Us Mehfil Main Ab Jana Naheen

Khud Farebi Hi Sahi ,Kiya Kijiye Dil Ka Ilaaj
Too Nazar Phaire To Ham Samjhain Ke Pehchana Naheen

Aik Duniya Muntazir Hai Aur Teri Bazm Main
Iss Tarha Bethai Hain Ham Jese Kaheen Jana Naheen

Ji Main Jo Aati Hai Kar Guzro ,Kaheen Aisaa Na Ho
Kal Pashemaan Hon Ke Kiyoon Dil Ka Kahaa Mana Naheen

Zindagi Par Iss Se Barh Ke Tanz Kiyaa Hoga Faraaz

Uss Ka Yeh Kehna Ke Too Sha'ir Hai Deevana Naheen

Tere Hote Hue Mehfil Main Jalaate Hain Chiraagh

Tere Hote Hue Mehfil Main Jalaate Hain Chiraagh
Log Kya Saada Hain Suraj Ko Dikhaate Hain Chiraagh

Apni Mehrumiyon Ke Ahsaas Par Sharminda Hain
Khud Naheen Rakhte To Auron Ke Bujhaate Hain Chiraagh

Bastiyaan Chaand Sitaaron Pe Basaane Walo
Kurrah-E-Arz Pe Bujhye Jaate Hain Chiraagh

Kya Khabar Hai Unko Ke Daaman Bhi Bhadak Uthte Hain
Jo Zamaane Ki Hawaaon Se Bachaate Hain Chiraagh

Aisi Taarikiyaan Aankhon Mein Basi Hai Faraaz

Raat To Raat Hai, Hum Din Ko Jalaate Hain Chiraagh

Juz Tere Koi Bhi Din Raat Na Jaane Mere

Juz Tere Koi Bhi Din Raat Na Jaane Mere
Tu Kahaan Hai Magar Aie Dost Puraane Mere

Aaj Ek Aur Baras Beet Gaya Uske Baghair
Jiske Hote Hue Hote The Zamaane Mere

Kaash Auron Ki Tarah Main Bhi Kabhi Keh Sakta
Baat Sun Li Hai Meri Aaj Khuda Ne Mere

Charah-Gar Yun To Bohat Hain Magar Aie Jaan-E-Faraaz
Juz Tere Aur Koi Zakh'm Na Jaane Mere