Friday, 2 May 2014

"Muntazir thy Hum Apny Bari ke

"Muntazir thy Hum Apny Bari ke
Or Khary Thy Katar Se Bahar.!!

Suna Hai Log Use Aankh Bhar Ke Daikhte Hain

Suna Hai Log Use Aankh Bhar Ke Daikhte Hain
So Uss Ke Shehar Main Kuch Din Thehar Ke Daikhte Hain

Suna Hai Rabt Hai Uss Ko Kharaab Haalon Se
So Apne Aap Ko Barbaad Kar Ke Daikhte Hain

Suna Hai Dard Ki Gaahak Hai Chashm E Naaz Uss Ki
So Ham Bhi Uss Ki Gali Se Guzar Ke Daikhte Hain

Suna Hai Uss Ko Bhi Hai Shair O Shairi Se Shughaf
So Ham Bhi Mo'jaze Apne Hunar Ke Daikhte Hain

Suna Hai Bole To Baaton Se Phool Jhadte Hain
Yeh Baat Hai To Chalo Baat Kar Ke Daikhte Hain

Suna Hai Raat Usse Chand Takta Rehta Hai
Sitare Baam E Falak Se Utar Ke Daikhte Hain

Suna Hai Din Ko Usse Titliyaan Satati Hain
Suna Hai Raat Ko Jugnoo Guzar Ke Daikhte Hain

Suna Hai Hashr Hain Uss Ki Ghazaal Si Aankhain
Suna Hai Uss Ko Hiran Dasht Bhar Ke Daikhte Hain

Suna Hai Raat Se Badh Kar Hain Kaakulain Uss Ki
Suna Hai Shaam Ko Saae Guzar Ke Daikhte Hain

Siyaah Chashm To Daikhe Hain Par Na Aise Bhi
Ke Uss Ko Surma Farosh, Aah Bhar Ke Daikhte Hain

Suna Hai Uss Ke Labon Se Gulaab Jalte Hain
So Ham Bahaar Pe Ilzaam Dhar Ke Daikhte Hain

Suna Hai ,Aa'i'na Tamsaal Hai Jabeen Uss Ki
Jo Saada Dil Hain Usse Ban Sanvar Ke Daikhte Hain

Suna Hai Jab Se Hama'il Hain Uss Ki Gardan Main
Mizaj Aur Hi Laal O Guhar Ke Daikhte Hain

Suna Hai Chashm E Tasavvur Se Dasht-E-Imkaan Main
Palang Zaviye Uss Ki Kamar Ke Daikhte Hain

Suna Hai Uss Ke Badan Ki Taraash Aisi Hai
Ke Phool Apni Qaba'ain Katar Ke Daikhte Hain

Voh Sarv Qad Hai Magar Be-Gul-E-Muraad Nahin
Ke Uss Shajar Pe Shagoofe Samar Ke Daikhte Hain

Nazar Uththe To Yeh Samjho Ke Deen O Dil To Gae
So Rahravaan-E-Tamanna Bhi Dar Ke Daikhte Hain

Suna Hai Uss Ke Shabistan Se Mut'tasil Hai Bahisht
Makeen Udhar Ke Bhi Jalve Idhar Ke Daikhte Hain

Ruke To Gardishain Uss Ka Tavaaf Karti Hain
Chale To Uss Ko Zamane Thehar Ke Daikhte Hain

Kise Naseeb Ke Be-Pairahan Use Daikhe
Kabhi Kabhi Dar O Deevaar Ghar Ke Daikhte Hain

Kahaniyaan Hi Sahi ,Sab Mubalighe Hi Sahi
Agar Voh Khavaab Hai ,Tabeer Kar Ke Daikhte Hain

Ab Uss Ke Shehr Main Tehrain Ke Kooch Kar Jaaen
Faraz Aao Sitare Safar Ke Daikhte Hain

Jis Simt Bhi Dekhoon, Nazar Aata Hai Keh Tum Ho

 Jis Simt Bhi Dekhoon, Nazar Aata Hai Keh Tum Ho
Aie Jaan-E-Jahaan Yeh Koi Saaya Hai Keh Tum Ho

Yeh Khuwaab Hai, Khushboo Hai, Ke Jhonka Hai, Ke Pal Hai
Yeh Dhund Hai, Baadal Hai, Ke Saaya Hai, Keh Tum Ho

Is Deed Ki Saa'at Main Kayee Rung Hain Larzaan
Main Hoon Ke Koi Aur Hai, Duniya Hai, Keh Tum Ho

Dekho Yeh Kisi Aur Ki Aankhen Hain Ke Meri
Dekhoon Yeh Kisi Aur Ka Chehra Hai Keh Tum Ho

Yeh Umr Garezaan Kahin Theray To Yeh Jaanoon
Her Saans Mein Mujh Ko Yehi Lagtaa Hai Keh Tum Ho

Her Bazm Mein Mozoo-E-Sukhan Dil-E-Zadgaan Ka
Ab Kaun Hai Sheereen Keh Laila Hai Keh Tum Ho

Ek Dard Ka Phaila Hua Sehra Hai Ke Main Hoon
Ek Mauj Mein Aaya Hua Darya Hai Keh Tum Ho

Woh Waqt Na Aaye Ke Dil-E-Zaar Bhi Sochay
Is Shehr Mein Tanha Koi Tum Sa Hai Keh Tum Ho

Aabaad Hum Aashufta Saron Se Nahin Maqtal
Yeh Rasm Abhi Shehr Mein Zinda Hai Keh Tum Ho

Aie Jaan-E-Faraaz Itni Bhi Taufeeq Kise Thee
Hum Ko Ghame Hasti Bhi Gawaraah Hai Keh Tum Ho


Yeh Tabi'aat Hai To Khud Aazaar Ban Jaayen Ge Ham

Yeh Tabi'aat Hai To  Khud Aazaar Ban Jaayen Ge Ham
Chaaragar Royein Ge Aur Gham Khwaar Ban Jaayen Ge Ham

Ham Sar-E-Chaak-E-Wafaa Hain Aur Tira Dast-E-Hunar
Jo Bana De Ga Hamein Aie Yaar, Ban Jaayen Ge Ham

Kya Khabar Thi Aie Nigaar-E-She'r, Tere Ishq Mein
Dilbaraan-E-Sheh'r Ke Dildaar Ban Jaayen Ge Ham

Sakht Jaan Hain Par Hamaari Ust'vaari Par Na Ja
Aise Tootenge, Tira Iqraar Ban Jaayen Ge Ham

Aur Kuchh Din Baithne Do Ku-E-Jaanaan Mein Hamein
Raftaa Raftaa Saaya-E-Deewar Ban Jaayen Ge Ham

Is Qad'r Aasaan Na Hogi Har Kisi Se Dosti
Aashnaa'i Mein Tira May'aar Ban Jaayein Ge Ham

Meer-O-Ghalib Kya Keh Ban Paaye Naheen Faiz-O-Firaaq
Za'm Ye Tha Roomi-O-Ataar Ban Jaayein Ge Ham

Dekhne Mein Shaakh-E-Gul Lagte Hain Lekin Dekhnaa
Dast-E-Gulcheen Ke Liye Talwaar Ban Jaayein Ge Ham

Ham Chiraagon Ko To Taa'reeki Se Larhnaa Hai Faraaz
Gul Huay Par Subah Ke Aasaar Ban Jaayein Ge Ham


Mustaqil Mehroomiyon Par Bhi To Dil Maana Naheen

Mustaqil Mehroomiyon Par Bhi To Dil Maana Naheen
Laakh Samjhaaya Ke ,Us Mehfil Main Ab Jana Naheen

Khud Farebi Hi Sahi ,Kiya Kijiye Dil Ka Ilaaj
Too Nazar Phaire To Ham Samjhain Ke Pehchana Naheen

Aik Duniya Muntazir Hai Aur Teri Bazm Main
Iss Tarha Bethai Hain Ham Jese Kaheen Jana Naheen

Ji Main Jo Aati Hai Kar Guzro ,Kaheen Aisaa Na Ho
Kal Pashemaan Hon Ke Kiyoon Dil Ka Kahaa Mana Naheen

Zindagi Par Iss Se Barh Ke Tanz Kiyaa Hoga Faraaz

Uss Ka Yeh Kehna Ke Too Sha'ir Hai Deevana Naheen